Í dag benti Matthías Ásgeirsson í Vantrú á að ræða Guðna Ágústssonar á vef Alþingisvefsins, eins og hún kemur fyrir í textaformi, sé aðeins öðruvísi en sú sem hann hélt í ræðustól. Fyrst bjuggust menn við að þetta væri einhver yfirsjón hjá þeim sem slá inn ræðurnar, en Vísir hafði samband við Guðna og þar viðurkenndi hann að hann hafi breytt ræðunni eftir á þar sem hann taldi sig hafa gengið of langt.
Nú get ég auðvitað röflað endalaust um það hvað ég er ósammála Guðna í þessu máli, hvort sem er í ritaða textanum eða því sem hann sagði blaðlaust - finnst það bæði vera niðrandi sagt af honum, en eitt er víst að héðan í frá mun maður horfa öðrum augum á áræðanleika þess sem skrifað er á alþingisvefinn. Ef alþingismenn eða aðrir hafa ráðrúm til að breyta og hreinlega falsa heimildir um það sem þeir hafa sagt eða gert áður, þá finnst mér ansi lítið til hins háa Alþingis koma. Hvað þá að þetta gæti stangast á við hugmyndina um opna og gegnsægja stjórnsýslu.
Það er spurning hvort blaðamenn og fólk sem er að berjast fyrir ákveðnum málefnum (og fólk í heimildaleit á alþingisvefnum) þurfi núna að fara að yfirfara allar ræður sem þar eru fluttar til að vera öruggt um að það sem skrifað sé þar hafi verið sagt í raunveruleikanum, en ekki fegrað og breytt af þingmönnum seinna meir, þegar þeir telja að ummælin hafi kanski verið of hörð eða ekki við hæfi. Þessi málsgrein segir ef til vill allt sem segja þarf um starfshætti sem virðast líðast á Alþingi:

Breytingar á ræðum þingmanna, frá því að þær falla í ræðustólnum og þangað til þær enda á vefnum, eru víst algengar að sögn Guðna, enda er það réttur allra þingmanna að mega yfirfara sínar ræður. „Yfirleitt breyta menn ekki merkingunni mikið en þetta var heldur lengra en ég vildi og ég játa það.”

Fyrir utan hve rangt mér finnst það að vera að breyta ræðunum eftir á, þá fer Guðni hér vel yfir strikið og breytir hreinlega merkingu orða sinna. Ég tel annars að einhver fjölmiðillinn ætti að senda spurningalista á þingmenn og spurjast fyrir hvort þeir hafi breytt ræðum sínum og ef svo er hvort þeir geri það oft. Ég vil vita hvort þingmenn landsins komi hreint fram eður ei. Þetta hefur reyndar kanski aðeins minna vægi en mörg lygin sem sögð er, en óheiðarleiki er þetta samt og ég tel að ráðamenn þjóðarinnar eigi ekki að standa í þannig leik.

Í versta falli ætti (annars góður) alþingisvefurinn að taka það til skoðunar að hafa möguleika á að ræður þingamanna birtist óbreyttar, en þingmenn geti svo gert athugasemdir (eins og comments í word eða alíka) við punkta sem þeir telja sig hafa farið offari í eins og þessu máli

—

Kaldhæðni dagsins frá Denver