Frá Hornströndum til Brighton

Loksins, fyrir þá sem ekki hafa séð myndirnar á facebook, þá er hér fyrsti pakkinn af myndum frá Hornstrandaferðinni í sumar. Læt fylgja með það sem ég skrifaði við albúmið á fésinu:
“Ferð á Hornstrandir með Ferðafélagi Íslands 5-12 júlí 2009. Fórum til Norðurfjarðar og sigldum þaðan til Hlöðuvíkur þar sem gist var í þrjár nætur. Farið var svo yfir til Hornbjargsvita í Látruvík og gist þar í 3 nætur einnig áður en haldið var til Norðurfjarðar aftur.”

Vonandi að ég verði ekki latur um helgina og hendi inn smá aukalega þá.

—

Annars er það að frétta af manni að fyrir rúmum tveimur vikum tók ég á móti tveimur stelpum frá Ísrael í gegnum couchsurfing.com. Þær voru hér í nokkrar nætur áður en þær héldu heim til landsins helga, en þær höfðu ferðast í 2-3 vikur hérlendis áður. Mjög gaman að fá þær í heimsókn og að fá t.d. viðbrögðin hjá þeim þegar þær föttuðu að maður gat labbað með þeim alveg í kringum forsetaheimilið á Bessastöðum og að enginn vopnaður vörður væri þar. Einnig að fræðast um matarvenjur þeirra, en þær voru trúaðir gyðingar og voru ekki tilbúinn í hvaða kjötmeti sem er

Um síðustu helgi var svo haldið með pabba, Óla pabba, Jonna (vinnufélaga pabba) og syni Jonna uppá Fjallabak nyrðra þar sem stoppað var í Landmannahelli og svo farið að veiða í Dómadalsvatni og Ljótapolli. Höfðum nokkra spræka urriða, þó veiðin hefði nú mátt vera betri. Á leiðinni til baka komum við við í Álunum en höfðum einnig lítið þar. Nóg af fiski í ánni, en hann virtist ekki vera að grípa við flugunni og synnti ávallt framhjá góðgætinu. Engu að síður fínasta ferð og veiðidellan er aðeins vöknuð á ný og planið er að hittast á morgun og prufa að hnýta aðeins aftur.

—

Er búinn að vera að hlusta smá á Moby í kvöld. Lög af diskunum Play og 18. Þegar ég hlustaði á 18 rifjaðist upp fyrir mér enskuskóladvölin í Brighton fyrir margt löngu. Þar gerðist ég einmitt mikill kaupmaður á allskonar tónlist sem var hræódýr þar ytra miðað við heima. Fjárfesti meðal annars í fyrrnefndum disk og hlustaði mikið á hann í walkmaninum þegar maður var í tveggja hæða strætó á leiðinni heim á kvöldin. Good times.