Hverjir eiga að taka ákvarðanir?

Hafnfirðingar munu í mars ganga til atkvæðagreiðslu um stækkun álversins í Straumsvík. Skiljanlega er þetta mikið hagsmunamál fyrir íbúa Hafnafjarðar, en varðar þetta ekki mun fleiri aðila? Er það réttlátt að einungis Hafnfirðingar fái að kjósa um slíka framkvæmd? Vissulega skiptir þetta íbúa þessa svæðis að miklu leiti mun meira máli en aðra íbúa landsins. Þetta mun væntanlega rýra verðmæti íbúðarhúsnæðis í x-radíus frá álverinu, auka sjónmengun, skapa fleiri störf, koma iðnaðarstimpli enn frekar á bæinn, auka tekjur bæjarins og auka töluvert mengun í næsta nágreni við álverið.

En framkvæmdin sem slík er ekkert einkamál Hafnfirðinga. Íbúar nágrannasveitarfélaganna munu einnig hljóta smá skammt af auknum útblæstri, þeim munu bjóðast fleiri störf og jafnvel verða ytri áhrif frá virkjuninni í formi mikilla rafmagnslínumannvirkja á landsvæði nágrannanna og virkjana í Þjórsá.

Maður spyr sig því hvort það sé alfarið undir Hafnfirðingum komið hvað hluti af þjóðinni, búsettur annarsstaðar en í Hafnarfirði, þurfi að sætta sig við. Væri ekki nær að aðrir fengju eitthvað um málið að segja, þeir sem búa í nágrannasveitarfélögum, þeir sem gætu hugsanlega haft hag af atvinnu þarna og íbúar í Þjórsárdal. Skilgreiningin á frelsi er að þú megir gera allt sem þú vilt svo framarlega sem það skaði engan annan. Aukin mengun, rafmagnslínur og virkjanir eru hlutir sem skaða, eða hafa allavega áhrif á fleiri en bara Hafnfirðinga og ættu því að vera valkostur allra sem málið snertir.

Höfundur situr í stjórn Hugins og er nemi við Háskólann á Bifröst

Greinin birtist á vefritinu hægri.is 12. febrúar 2007