Kirkjan og skólar

Börn eru fyrir flesta það mikilvægasta sem þeir eiga. Við viljum börnunum okkar vel og við viljum að þau hljóti eins fjölbreytt og gott uppeldi og möguleiki er á. Flest okkar viljum við að hlutleysis sé gætt af hálfu kennara við kennslu. Kennarar tali almennt um málefni, reyni að fá börnin til að hugsa sjálfstætt og mynda sínar eigin skoðanir á mönnum og málefnum. Þessu er þó menntamálaráðuneytið ekki sammála og vill troða vissum skoðunum og hagsmunum uppá börnin.

Ef við dettum niður á viss markmið í aðalnámskrám leik- og grunnskóla má sjá að menntamálaráðuneytið vill byggja kennslu barna á þessum stigum á siðfræði kristinnar trúar:

“Efla kristilegt siðgæði barna og leggja grundvöll að því að börnin verði sjálfstæðir, hugsandi, virkir og ábyrgir þátttakendur í lýðræðisþjóðfélagi sem er í örri og sífelldri þróun.” - Úr aðalnámskrá leikskóla¹

“Starfshættir grunnskóla skulu mótast af gildum lýðræðislegs samstarfs, kristins siðgæðis og umburðalyndis.” - Úr aðalnámskrá grunnskóla²

Í krafti þessara orða virðist Þjóðkirkjan eiga greiða leið inn í leik- og grunnskóla landsins og var vígsla skólaprests fyrir Garðasókn nú á dögunum gott dæmi um það. Þess má geta að grunnlaun skólaprests eru rétt rúmar 460.000 kr.³, meðan grunnlaun kennara eru um 160.000 kr. Fyrir þessa upphæð (sem að endingu kemur úr vasa ríkisins hvort sem er) má ráða tæplega þrjá kennara eða einn til tvo faglærða sálfræðinga, en það virðist einmitt eiga að vera meginstarf skólaprests, að leysa sálfræðinga af.

Viljum við að starfsfólk þessarar stofnunar hafi greiðan aðgang að börnum okkar meðan þau eru ómótuð og taka enn mörgu sem sjálfsögðum hlut án þess að beita mótrökum? Hugsun margra er á þá leið að þetta sé nú Þjóðkirkja landsins og þar sem um 84%⁴ þjóðarinnar séu skráð í hana, sé þetta í lagi. En ef við myndum snúa dæminu aðeins við og gefa okkur að 84% þjóðarinnar myndu styðja einn stjórnmálaflokk eða vera í viðskiptum við einn banka. Þýddi það þá að þeir aðilar ættu að fá greiðan aðgang með boðskap sinn og auglýsingar í skólana?

Einhverjum kann að finnast þetta gróf samlíking, en svona er þetta. Kirkjan er stofnun sem þarf peninga og fær hún meiri peninga eftir því sem meðlimafjöldi eykst. Einnig hefur kirkjan viss völd bakvið þessa meðlimatölu og þau völd vill hún ekki missa.

Það hlýtur því að vera krafa almennings að heimsóknir presta í grunnskóla, heimsóknir leikskólakrakka í kirkjur, heimsóknir presta í leikskóla, ferðir úr leikskólum á skemmtanir í kirkjum og önnur óþarfa tengsl skólakerfisins við þjóðkirkjuna verði aflögð, og í staðinn teknar upp hlutlausar kennsluaðferðir þar sem börnin eru frædd um trú og siðfræði án þess að stundað sé trúboð.

Höfundur situr í stjórn Hugins og er nemi við Háskólann á Bifröst.

*1 http://bella.stjr.is/utgafur/ALalmennurhluti.pdf
*2 http://bella.stjr.is/utgafur/AGalmennurhluti.pdf
*3 http://www.vantru.is/2006/10/02/08.00/
*4 http://www.hagstofa.is/?PageID=632&src=/temp/Dialog/varval.asp?ma=MAN10200%26ti=Mannfj%F6ldi+eftir+tr%FAf%E9l%F6gum+og+skr%E1ningu+1994%2D2005+++++++%26path=../Database/mannfjoldi/Trufelog/%26lang=3%26units=fj%C3%B6ldi

Grein þessi birtist á vefritinu hægri.is 6. október 2006